Bu müstəntiq işdən qovuldu - Şəhid qızını öldürən... 

Report xəbər verir ki, bu barədə Bakı Ağır Cinayətlər Məhkəməsində keçirilən iclasda məlum olub.

R.Rəhimovun vəkili Muxtar Mustafayev ötən məhkəmə iclaslarında bildirib ki, müstəntiq hazırda sərəncamdadır.

Müstəntiq V.Abbasovun işdən çıxarılmasına səbəb kimi isə vəzifə borcunu yerinə yetirərkən ciddi nöqsanlara yol verməsi göstərilib. Belə ki, V.Abbasovun rəhbərliyi ilə aparılan istintaq zamanı qəzanı törədən şəxsin R.Rəhimov deyil, onların ailə sürücüləri olan Əmrulla Şahbazov olduğu qeyd edilib.

Ə.Şahbazovdan qəzanı törətdiyini etiraf edən ifadə belə alınıb. Lakin qəza ilə bağlı xəbər ictimailəşəndən, mərhumun ailə üzvlərinin şikayətindən sonra iş yenidən araşdırılıb.

Hadisə şahidləri söyləyib ki, qəzanı gənc oğlan törədib. Bu da istintaqın axarını dəyişib. Qəza ilə bağlı başlanılan cinayət işi V.Abbasovdan alınıb. Daha sonra yeni istintaqla müəyyən edilib ki, qəzanı məhz R.Rəhimov törədib.

Müstəntiq V.Abbasov hətta Rəhim Rəhimovdan ifadə alıbmış ki, qəzanı sürücü Ə.Şahbazov törədib.

R.Rəhimov məhkəmədə hadisə yerindən qaçmasını və yalan ifadə verməsini izah edərkən qeyd edib ki, qəza yerinə gələn polis əməkdaşları ona atasını tanıdıqlarını və ailə sürücüləri gəldikdən sonra getməsini deyiblər.

Məhkəmədə elan edilib ki, işi araşdıran müstəntiq də dindiriləcək.

Məhkəmənin növbəti iclası fevralın 13-nə təyin edilib.

Qeyd edək ki, Bakı şəhər prokurorluğu və şəhər Baş Polis İdarəsi ötən il noyabrın 8-də Səbail rayonunda baş vermiş qəza ilə bağlı yaydığı məlumata əsasən, Səbail rayonunun polis və prokurorluq əməkdaşları tərəfindən həyata keçirilmiş təxirəsalınmaz istintaq və əməliyyat-axtarış tədbirləri nəticəsində rayon ərazisində yol nəqliyyat hadisəsi törədərək hadisə yerindən qaçmış sürücü tutularaq istintaqa cəlb edilib.

Belə ki, noyabrın 8-də paytaxtın Səbail rayonu ərazisində naməlum sürücünün idarə etdiyi “Jeep Grand Cherokee” markalı 90-FO-007 dövlət nömrə nişanlı avtomobillə yolu keçmək istəyən 1975-ci il təvəllüdlü Əkbərova Könül Elton qızını vurması, sonuncunun aldığı xəsarətlərdən hadisə yerində vəfat etməsi və sürücünün hadisə yerindən qaçması faktına görə rayon Polis İdarəsinin İstintaq şöbəsində Cinayət Məcəlləsinin 263.2 (yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələri ilə cinayət işi başlanıb. Aparılmış təxirəsalınmaz istintaq-əməliyyat tədbirləri nəticəsində hadisə vaxtı qeyd edilən avtomobilin sürücülük hüququ olmayan, yetkinlik yaşına çatmayan - 2000-ci il təvəllüdlü Rəhim Rəhimov tərəfindən idarə edilməsi müəyyən edildiyindən cinayət işi Cinayət Məcəlləsinin 263-1.3 (nəqliyyat vasitələrini idarə etmək hüququ olmayan şəxs tərəfindən yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələrinə tövsif edilib, R.Rəhimov noyabrın 29-da şübhəli şəxs qismində tutularaq müdafiəçi ilə təmin edilməklə dindirilib. O, iş üzrə təqsirləndirilən şəxs qismində cəlb olunaraq ona Cinayət Məcəlləsinin qeyd edilən maddələri ilə ittiham elan edilməklə məhkəmənin qərarı ilə barəsində həbs qətimkan tədbiri seçilib.

Xatırladaq ki, qəzanı törədən 17 yaşlı R.Rəhimov iş adamı, “Xırdalan Xəz” ASC-nin rəhbəri Akif Rəhimovun oğludur. A.Rəhimov isə “Yeganə” şadlıq sarayının rəhbəri Məmməd Rəhimovun qardaşıdır.

Qəzada ölən K.Ələkbərova isə şəhid Elton Ələkbərovun qızıdır.