Daha 7 azərbaycanlı Almaniyadan deportasiya ediləcək- Məhkəmə qərar verib 

Məlumatda deyilir ki, bu barədə Berlin və Köln şəhər idarə məhkəmələri müvafiq qərarlar veriblər.

Deportasiya qərarları Almaniyada adı müxtəlif cinayət hadisələrinə qarışan 24 nəfərə şamil edilib. Onların arasında Rusiya, Türkiyə və Azərbaycan vətəndaşı olan 7 azərbaycanlı da var.

Onlar 2014-2020-ci illərdə Almaniyada soyğunculuq, qəsdən adam yaralama, polisə müqavimət və onları yaralama maddələri ilə saxlanılan və həbs edilən şəxslərdir.

Məlumatda bildirilir ki, həmin şəxslərin vətəndaşı olduqları ölkələrə deportasiyası üçün danışıqlar aparılır.

Almaniya Federal Kriminal İdarədən Report.az-ın Avropa bürosuna bildirilib ki, 2020-ci ilin yanvar-sentyabr aylarında əcnəbilərin iştirakı ilə ümumilikdə 188 699 cinayət hadisəsi qeydə alınıb. İstintaq və məhkəmə araşdırmaları zamanı onların bir çoxunun cinayət işi ilə əlaqəsinin olmadığı üzə çıxıb.