Füzuli rayon RİH başçısı Alı Alıyev onlayn müşavirə keçirdi 

Faktinfo.az xəbər verir ki,Müşavirədə koronavirus (COVID-19) infeksiyası ilə bağlı rayonda vəziyyət və görülən işlər müzakirə edildi. RİH başçısı bildirdi ki, Nazirlər Kabineti yanına Operativ Qərargahın yeni qaydalarına əsasən ümumi karantin rejimi müddəti 31 may 2020-ci ilə qədər uzadılır. Eyni zamanda Bakı, Sumqayıt, Gəncə, Lənkəran şəhərləri və Abşeron rayonu istisna olmaqla respublikanın digər rayon və şəhərlərində tətbiq edilən bir sıra məhdudiyyətlərin yumşaldılmasına dair qərar verilib.

Bununla yanaşı məhdudiyyətlərin yumşaldılması ilə eyni zamanda koronovirusla mübarizə tədbirləri, dezinfeksiya işləri daim davam etdirilməlidir. Restoran, kafe və çay evlərində müştərilərə yerində xidmətlər bərpa olunsada müəyyən olunmuş qaydalara və sanitar gigiyeniq normalara əməl olunmalıdır. Toy və çox sayda insanın iştirakı ilə yas mərasimlərinin keçirilməsi qadağandır. Parklarda və ictimai iaşə obyektlərində insanların 10 nəfərdən artıq qruplarda cəmlənməsi qadağandır.

RİH başçısı bildirdi ki, bəzi rayonlarda məsul şəxslər vəzifə saxtakarlığına yol verərək arayışlara bilə-bilə yalan məlumatlar daxil edib ayrı-ayrı şəxslərin xüsusi karantin rejimi qaydalarına zidd olaraq rayon ərazisini tərk etməsinə şərait yaratdıqlarına görə vəzifələrindən azad edilərək haqlarında cinayət işi açılmışdır. Bir daha icra nümayəndələri və bələdiyyə sədrlərinə tapşırıldı ki, belə hallara yol verən şəxslər kimliyindən asılı olmayaraq vəzifəsindən azad edilərək cinayət məsuliyyətinə cəlb ediləcəkdir.