Leş ət satışına görə məhkum olunan həkimə bəraət verildi 

Vəkil Hafiz Ələsgərovun verdiyi məlumata görə, hakim Vaqif Mursaqulovun sədrlik etdiyi iclasda qərar elan edilib.

 Qərara əsasən, hər iki şəxsə bəraət verilib.

 Qeyd edək ki, 2018-ci ilin oktyabr ayında Bakı şəhəri, Nəsimi rayonu, S.Vurğun küçəsi 73 və 73a saylı ünvanlarda yerləşən satış məntəqələrində leş ət aşkarlanıb. Mənşəyi məlum olmayan, habelə gigiyenik və sanitar normaların tələblərinə uyğun olmayan, ümumi dəyəri 16 min manat olan ümumi çəkisi 2 449 kq 23 baş iribuynuzlu (inək) və ümumi çəkisi 42 kq 2 baş xırdabuynuzlu (qoyun) heyvan cəmdəklərinin satışı dayandırılıb.

 Agentliyin müvafiq laboratoriyasında aparılan sınaqlar nəticəsində ətlərin kəskin qoxulu, köhnə olmaqla ağır xəstə və ya tələf olduqdan sonra kəsilmiş istehlaka yararsız heyvanlara məxsus olduğu aşkar edilib.

Başlanan cinayət işinin istintaqı zamanı məlum olub ki, Agentliyin 5 saylı qida nəzarət məntəqəsinin həkimi Xaspolad Mirimovun Əlican Quliyevlə birgə insanların həyatı və sağlamlığı üçün təhlükə törədən, mənşəyi məlum olmayan, gigiyenik və sanitar normaların tələblərə uyğun olmayan, xeyli miqdar heyvan ətlərini ayrı-ayrı tədarükçülər tərəfindən keyfiyyətli ət adı ilə müxtəlif satış məntəqələrində topdan və pərakəndə satışını təşkil ediblər.

Çoxsaylı istehlakçılara qarşı dələduzluğa cəhd etmələrinə görə, onlara Cinayət Məcəlləsinin 29,178.2.1 (qabaqcadan əlbir olan bir qrup şəxs tərəfindən dələduzluğa cəhd), 29, 178.2.3 (qulluq mövqeyindən istifadə etməklə dələduzluğa cəhd), 29, 178.2.4 (xeyli miqdarda ziyan vurmaqla dələduzluğa cəhd), 29,200.2.2 (qabaqcadan əlbir olan bir qrup şəxs tərəfindən istehlakçıları aldatmağa cəhd), 29, 200.2.3 (külli miqdarda ziyan vurmaqla istehlakçıları aldatmağa cəhd) və 308.1-ci (mühüm zərərvurma ilə nəticələnən vəzifə səlahiyyətlərindən sui-istifadə) maddələri ilə ittiham elan edilib.

Bundan başqa, aparılan istintaqla bazara keyfiyyətsiz ət tədarük etmiş digər şəxslərə də müvafiq ittihamlar verilib.

Nəsimi Rayon Məhkəməsinin 11 fevral 2019-cu il tarixli hökmünə əsasən, təqsirləndirlən şəxslərin hər biri 1 000 manat məbləğində cərimə cəzasına məhkum edilib.

Təqsirləndirilən şəxslərdən Mirimov Xaspolad Osman oğlu və Quliyev Əlican Ərəstun oğlu hökmdən apellyasiya şikayəti versə də, təmin edilməyib. Daha sonra Ali Məhkəməyə kassasiya şikayəti verilib.

Ali Məhkəmə işi yenidən baxılması üçün apellyasiya instansiyasına qaytarıb.

 /Report.az