“ORA MƏNİM DƏDƏMİN, BABAMIN YERİ DEYİL” –Ağabəy Əsgərov Əli Həsənova ərazi ayrılması haqda suala belə cavab verdi 

Hazırda Beynəlxalq Mətbuat Mərkəzinin yerləşdiyi bina “Azərbaycan” Nəşriyyatın ərazisində yerləşir.

İddiaya görə, Əli Həsənov Prezident Administrasiyasının şöbə müdiri vəzifəsində çalışan zaman “Azərbaycan” Nəşriyyatının Baş direktoru Ağabəy Əsgərovdan həmin ərazini istəyib və sözügedən ərazidə bir neçə bina inşa etdirib. Onlardan biri isə indiki Beynəlxalq Mətbuat Mərkəzi adlanan binadır.

Məsələ ilə bağlı Demokrat.az-a açıqlama verən “Azərbaycan” Nəşriyyatının Baş direktoru Ağabəy Əsgərov belə deyib:

“Məgər nəşriyyatın binası mənim dədəmin, babamındır ki, kiməsə verim? O vaxtı dövlət tərəfindən elə məsələhət oldu ki, nəşriyyatın ərazisində Əli Həsənova yer verilsin. Əli Həsənov həmin ərazidə mətbuat evi tikib. Yenə deyirəm ki, onu Əli Həsənova mən verməmişəm, dövlət tərəfindən verilib. Axı mən kiməm ki, Əli Həsənova ərazi verim? Ora mənim dədəmin, babamın yeri deyil. Bu məsələnin mənə heç bir bağlılığı yoxdur”.

Ağabəy Əsgərov AMEA prezidenti Ramiz Mehdiyevin adamı olması barədə ittihamlara da cavab verib:

“Mən dövlətçiliyə, Ulu öndər Heydər Əliyevə və cənab Prezident İlham Əliyevə xidmət etmişəm. Bu gün də onlara xidmət edirəm”. /Demokrat.az