14 yaşlı qızla cinsi əlaqədə olmaqda ittiham edilən şəxsə bəraət verildi - TƏFƏRRÜAT

Qafqazinfo.az xəbər verir ki,bununla bağlı Bərdə Rayon Məhkəməsində gedən proses yekunlaşıb. Hakim təqsirləndirilən Y.B-yə qarşı ittihamın sübuta yetirilmədiyi haqda qərar çıxarıb və Bərdə rayon sakini olan həmin şəxsə bəraət verilib.

Belə ki, ötən ilin yayında Bərdənin Cumalar kənd sakini polisə müraciət edərək qızının 2020-ci ilin avqust ayında həmkəndlisi tərəfindən zorlandığını bildirib. Ekspertizanın rəyi əsasında həqiqətən də qızın bakirəliyinin pozulması müəyyən edilib.

Faktla bağlı Cinayət Məcəlləsinin 152.1-ci (16 yaşına çatmayan şəxslə cinsi əlaqədə olma və ya seksual xarakterli digər hərəkətlər etmə) maddəsi ilə cinayət işi başlanılıb. İş üzrə şübhəli şəxs qismində Bərdə şəhər sakini Y.B tutularaq istintaqa təqdim edilib.

Məhkəmədə prokuror həmin şəxsin 2 il müddətinə azadlıqdan məhrum edilməsini istəyib.

Məsələ ilə bağlı Baş Prokurorluğun Mətbuat xidmətindən isə bildirilib ki, hökmdən apellyasiya protesti veriləcək: “Qeyd edilən hökmdən tərəfimizdən apellyasiya protestinin verilməsi təmin ediləcək və nəticəsi barədə ictimaiyyətə əlavə məlumat veriləcək”.