Ermənilərin Gürcüstandakı azərbaycanlılara qarşı yeni qarayaxma kampaniyası 

Bu barədə Faktinfo.az-a göndərilən növbəti məqalədə bildirilir. AMEA-nın Qafqazşünaslıq İnstitutunun Gürcüstanşünaslıq şöbəsinin mütəxəssisi  Kamal Salayevin müəllifi olduğu məqaləni təqdim edirik:

Qeyd etmək lazımdır ki, Norayr Qasparyan [1], daha əvvəl də feysbuk sosial şəbəkəsində, saxta “məzlum erməni” obrazını yaratmaq üçün özünün guya azərbaycanlılar tərəfindən döyülməsinə və qaçmasına dair dezinformasiya xarakterli məlumat yaymışdır. Bir qayda olaraq özlərini yazıq kimi qələmə verməyə çalışan ermənilər, iyulun 12-dən başlayaraq Ermənistan silahlı qüvvələrinin Azərbaycan-Ermənistan sərhədinin Tovuz rayonu istiqamətində törətdiyi hərbi təxribatla bağlı xarici ölkələrdəki həmvətənlərimiz tərəfindən keçirilən aksiyaların qarşısını almaq üçün dinc həmvətənlərimizə qarşı ifrat aqressivlik nümayiş etdirərək təxribatçı əməllərini həyata keçirirlər. Belə ki, ermənilər Fransada, Böyük Britaniyada, İsveçdə, Polşada, Avstraliyada, ABŞ-da, Niderlandda və Belçikada həmvətənlərimizə qarşı psixoloji və fiziki zorakılığa əl atırlar. Həmvətənlərimizə xəsarət yetirmək məqsədilə erməni diasporunun üzvləri, Azərbaycanın diplomatik nümayəndəliklərinin binalarına və azərbaycanlıların dinc aksiyalarına qarşı cinayət məsuliyyəti doğuran təxribatlara əl atırlar.

Bu gün Azərbaycanın beynəlxalq aləmdəki nüfuzunun gündən-günə artması və müstəqil dövlətimizin regionda söz sahibinə çevrilməsi, dünyadakı anti-Azərbaycan qüvvələrini ciddi şəkildə narahat edir. Ona görə də onlar dünyanın müxtəlif yerlərində yaşayan Azərbaycanın dinc əhalisinə qarşı kütləvi şəkildə hücumlar təşkil edərək, əsassız ittihamlar irəli sürərək, sosial şəbəkələrdə saxta profillər yaradaraq, saytlarda dezinformasiya xarakterli məlumatları yayaraq öz əməllərini ört-bastır etməyə, azərbaycanlıları isə günahkar kimi qələmə verərək dünya ictimaiyyətini aldatmağa çalışırlar. Lakin el arasında belə bir məsəl vardır: - Yalan ayaq açar amma yeriməz. Bu baxımdan qeyd etmək lazımdır ki, erməni lobbisinin səylərinə baxmayaraq, ABŞ Konqresinin Qaydalar Komitəsində Ermənistanın Azərbaycan ərazilərini işğal faktını dövlət səviyyəsində ilk dəfə tanıyan 296 saylı düzəlişin qəbul edilməsi [2], ölkəmizin artıq Ermənistan üzərindəki siyasi-diplomatik qələbəsindən xəbər verir. Mühüm əhəmiyyəti olan həmin layihənin müəllifi konqresmen Stiv Şabot olmuşdur. Qəbul edilən 296 saylı düzəlişdə Azərbaycanın və digər 3 ölkənin ərazilərinin qeyri-qanuni işğal faktı təsdiqlənmişdir. Onu da qeyd etmək istəyirik ki, erməni lobbisinin “Milli Müdafiə Maliyyələşmə Qanunu” layihəsinə, Azərbaycanın əleyhinə bir neçə düzəlişin edilməsinə dair çalışmasına baxmayaraq həmin düzəlişlər qəbul edilməmişdir. Erməni lobbisinin uğursuzluğu, Daşnak partiyasını təmsil edən Amerikanın Erməni Milli Komitəsinin (ANCA) ciddi çaşqınlığına və məyusluğuna səbəb olmuşdur [2].

Ermənistanın məhz diplomatik sahədəki məğlubiyyəti, ABŞ-ın Los-Anceles şəhərində və bəzi Avropa ölkələrinin paytaxtlarında erməni ünsürünün fəallaşmasına və həmvətənlərimizə xəsarət yetirməsinə səbəb oldu. Şübhəsiz ki, ermənilər kütləvi hücumlarla azərbaycanlıları özündən çıxararaq haqq yolundan döndərməyə və beləliklə də dünya ictimaiyyətinin qarşısında haqsız vəziyyətə salmağa çalışırlar. Belə bir məqamda isə düşmənin fitnəsinə uymaq olmaz. Bu baxımdan qeyd etmək lazımdır ki, sözügedən məsələ ilə bağlı birinci vitse-prezidentimiz Mehriban Əliyeva [3] dünya azərbaycanlılarına müraciət etmişdir. Həmin müraciətdə deyilir: “Mən bütün dünya azərbaycanlılarını birgə hərəkət etməyə, azğınlaşmış düşmənə layiqli cavab vermək üçün bizim diasporun bütün potensialını birləşdirməyə çağırıram. Bununla belə, unutmamalıyıq ki, qeyri-insani nifrət hissini əsas götürən vəhşilərə və banditlərə bənzəmək olmaz. Bizim mübarizəmiz yalnız hüquq müstəvisi çərçivəsində aparılmalıdır”.

Baş verən hadisələr dünyaya, əslində Ermənistanın necə işğalçı və təcavüzkar bir dövlət olduğunu göstərdi ki, bu da ermənilərin məqsədyönlü şəkildə “Böyük Ermənistan” xülyasını reallaşdırmaq üçün Azərbaycana qarşı yürütdüyü işğalçı siyasətdən qaynaqlanır. Qeyd etmək lazımdır ki, Ermənistanın Azərbaycanın dinc əhalisinə qarşı yürütdüyü faşist ideologiyası, dövlət terrorizmi, soyqırımı və etnik təmizləmə siyasəti 30 ildən artıqdır ki, dünya ictimaiyyətinin gözü qarşısındadır. Bundan əlavə bu gün Ermənistanda sosial-iqtisadi böhranın olması, insanlara qarşı gücün tətbiq olunması, qan tökülməsi, məhkəmə qərarı olmadan insanların həbs olunması, İctimai kanalın özbaşına olaraq ələ keçirilməsi, eləcə də sabitsizliyin və xaosun baş alıb getməsi də göz qabağındadır.

Sonda onu qeyd etmək istəyirik ki, dünya birliyi, Ermənistan rəsmilərini beynəlxalq birliyin iradəsinə tabe etdirməklə, ermənilərin Azərbaycanın ərazi bütövlüyünü və suverenliyini kobud şəkildə pozan, hüquqa zidd addımlarının qarşısını qətiyyətlə almalıdır.

Ədəbiyyat siyahısı:

1. Азербайджанцы напали на армянина в грузинском селе Садахло - мотивы пока не известны /26.07.2020/ https://ru.armeniasputnik.am/incidents/20200726/23889579/Azerbaydzhantsy-napali-na-armyanina-v-gruzinskom-sele-Sadakhlo---motivy-poka-ne-izvestny.html

2. Azərbaycan ərazilərinin işğal faktını tanıyan düzəliş konqresdə qəbul edilib /21.07.2020/ http://cbc.az/az/az/v_story/azrbaycan-razlrnn-al-faktini-taniyan-dzl-konqresd-qbul-edlb

3. Mehriban Əliyeva: “Heç bir provokasiya bizi haqq yolundan dönməyə məcbur edə bilməz” /24.07.2020/ https://demokrat.az/news/46180