Suraxanı yaşayış binalarında qanunsuzluq - Video 

Faktinfo.az Xəzər TV-yə istinadən xəbər verir ki, söhbət Suraxanı rayonu, Yeni Günəşli qəsəbəsindən gedir.

Burada yerləşən bir neçə binada eyni mənzərə müşahidə olunur. Əksər vətəndaşlar lift yerləşən ərazidən hazır divar kimi istifadə ediblər.

Həmin ərazidə yerləşən 117-ci binada da vəziyyət eynidir.

Memar Elçin Əliyev deyir ki, bu cür qeyri-qanuni artırmalar bina üçün əlavə yükdür və binanın konstruksiyalarına təzyiq göstərir. Bu hal həmçinin vətəndaşların özləri üçün də təhlükə deməkdir.

Memarın sözlərinə görə, hazırda şəhərin bir sıra mərkəzi küçələrində abadlıq işləri aparılır ki, nəticədə bu cür qeyri-qanuni tikililər sökülür və binaların ilkin layihə görünüşü geri qaytarılır. Bu zaman hətta sovet dövründə alınan sənəd belə etibarsız hesab olunur.

Məsələ ilə bağlı Suraxanı Rayon İcra Hakimiyyətinin nümayəndəsi Xanoğlan Allahverdiyev bildirib ki, onların hansısa bir vətəndaşa icazə sənədi vermək kimi hüquqları yoxdur və heç kimə də belə icazə verilməyib.

Suraxanı Mənzil-Kommunal Təsərrüfatı Departamentinin baş mühəndisi Tural Zeyniyev isə ümumiyyətlə məsələdən xəbərdar olmadığını bildirdi.

QEYD: Bakı Şəhər Mənzil-Kommunal Təsərrüfatı Departamentinin rəisi Rafael Mehrəliyev başda olmaqla,Bakı şəhərinin MKTB-nin əksər rəislərində bir arxayınçılıq hissi var.Bunun nədən irəli gəldiyini dəqiq deyə bilməsək də,fakt odur ki,heç kim liftin yerləşdiyi hissəni belə özbaşına zəbt edə bilməz.

Necə olur,istənilən vətəndaş Bakıda bir quş damı tikəndə aidiyyatı təşkilat xəbər tutur,əraziyə onlarla "papkalı" gəlir,amma Suraxanı və Bakının əksər rayonunda eyvan,liftin yerləşdiyi hissə,binaların zirzəmilərinin satılmasından MKTB-nin rəisləri xəbərsiz olurlar?! Düşündürücüdür deyilmi?

Mövzunu diqqətdə saxlayacağıq.

Faktinfo.az