Xəzərdə tapılan qalıqların kimə məxsus olduğu müəyyənləşdi 

Bunu Report.az-a Azərbaycan Dövlət Neft Şirkətinin (SOCAR) İctimaiyyətlə əlaqələr və tədbirlərin təşkili idarəsinin rəis müavini İbrahim Əhmədov bildirib.

Onun sözlərinə görə, SOCAR bu məsələ ilə bağlı Su Nəqliyyatında Polis İdarəsi ilə daim əlaqədədir: “Bizə verilən son məlumata görə, bu qalıqların 2015-ci ildə itkin düşmüş Bəhmən Cəfərova aid olduğu ehtimal olunur və buna görə onun oğlu da ekspertizaya cəlb olunub”.

İ.Əhmədov bildirib ki, lakin ekspertizanın nəticəsi hələ müəyyən olunmayıb.

Qeyd edək ki, 2015-ci ildə Xəzər dənizində “Neft Daşları” NQÇİ-nin 501 nömrəli özülündə güclü tufan nəticəsində dalğalar estakada döşəməsini üstündəki yaşayış köşkü ilə birlikdə dənizə atıb. Hadisə baş verərkən buxar aqreqatının maşinisti 1971-ci il təvəllüdlü Cavad Xudaverdiyev, səyyar aqreqatın motorçuları - 1961-ci il təvəllüdlü Bəhmən Cəfərov və 1974-cü il təvəllüdlü Rövşən Məmmədov köşkdə olublar.

***

2015-ci il dekabrın 4-də “Neft Daşları” NQÇİ-nin 501 nömrəli özülündə baş verən qəza nəticəsində itkin düşən neftçilərdən birinin meyitinin tibbi ekspertizasından sonra şəxsiyyəti müəyyənləşib.

Meyit ölən neftçilərdən birinə - Bəhmən Cəfərova məxsusdur.

Baş Prokurorluğun Mətbuat Xidməti faktı təsdiqləyib.