XİN-də RUS DİLİ HEGEMONLUĞU: "Kələntəryana yarınmaq üçün..." - SƏRT ETİRAZ
Ötən gün keçirilən Azərbaycan və Rusiya Xarici İşlər nazirlərinin birgə mətbuat konfransında jurnalistlərə Azərbaycan dilində sual vermə imkanının yaradılmaması XİN-i tənqid obyektinə çevirib.
Məsələ ilə bağlı Yenicag.az-a açıqlama verən Müair Müsavat Partiyasının (MMP) sədri Hafiz Hacıyev XİN-in bu addımını “Kələntəryana yarınmaq”cəhdi kimi dəyərləndirib:
“Çox təəssüf hissi keçirdim. Bura Azərbaycandır. Ancaq, görünür, kimsə Lavrova, Kələntəryana yarınmaq üçün bu addımı atıb. Düşünürəm ki, bu, Azərbaycan konstitutsiyasına hörmətsizlikdir, Azərbaycan milli maraqlarına tamamilə zidd olan bir addımdır. Bunu Azərbaycan dilinin alçaldılması, dəyərsizləşdirilməsi kimi başa düşürəm”.
Demokrat Partiyasının (ADP) sədri Sərdar Cəlaloğlu isə bunu Lavrovun anti-Azərbaycan mövqeyi ilə əlaqələndirib:
“Lavrov anti-Azərbaycan mövqeyində olan adamdır, çox ciddi şəkildə Azərbaycanın əleyhinə mövqe tutur. Bizim jurnalistlər sual verib onun ermənipərəst mövqeyini ifşa edəcəkdi, ona görə də skandal olmasın deyə bizim jurnalistlərə sual ünvanlamağa imkan verməyiblər”.
Bu xəbər üçün şərh yazın