Əli İnsanov Müsavata gedəcək- Müxalifətin dəyirmi masası keçiriləcək

Qeyd edək ki, Müsavat Partiyasının başqanı Arif Hacılı oktyabrın 23-də müxalifətin birliyi ideyasının, ölkədəki siyasi durumdan çıxış yollarının müzakirəsi üçün açıq dəyirmi masa keçirilməsini təklif edib.

O, dəyirmi masaya Demokratik Qüvvələrin Milli Şurasının sədri Cəmil Həsənlini, AXCP sədri Əli Kərimlini, Respublikaçı Alternativ Partiyasının sədri İlqar Məmmədovu, Azərbaycan Xalq Partiyasının sədri Pənah Hüseyni, Milli Strateji Düşüncə Mərkəzinin sədri İsa Qəmbəri, sabiq səhiyyə naziri Əli İnsanovu, “Turan” Agentliyinin direktoru Mehman Əliyevi, politoloq Hikmət Hacızadəni dəvət edib və siyasi təşkilat rəhbərlərinin razılaşacağı digər siyasi xadimlərin iştirakını məqbul sayıb.

Arif Hacılı oktyabrın 27-də sosial şəbəkədə bəyan edib ki, ölkədə yaranmış siyasi durumu dəyərləndirmək və vəziyyətdən çıxış yolları barədə müzakirələr aparmaq üçün dəyirmi masa keçirmək təklifi ilə müraciət etdiyi 8 siyasətçinin 5-dən müsbət cavab alıb, hələlik imtina edən olmayıb.

Noyabrın 1-də isə Müsavat başqanı sosial şəbəkədə bildirib ki, heç bir ilkin şərt irəli sürmədən, ölkədə mövcud durumu müzakirə etmək, çıxış yolları barədə fikir mübadiləsi aparmaq, mümkün olarsa bəzi razılaşmaların təsdiqlənməsi məqsədi ilə nəzərdə tutulan dəyirmi masa noyabr ayının 5-də baş tutacaq.

Dəyirmi masaya dəvət alan AXP sədri Pənah Hüseyn noyabrın  açıqlamasında bildirib ki, toplantıda mütləq iştirak edəcək. Pənah Hüseyn onu da məlumat verdi ki, siyahıda adı qeyd olunan şəxslərin hamısı, o cümlədən Əli İnsanov Müsavatda keçiriləcək dəyirmi masaya gələcək: “Məndə olan məlumata görə, həm Əli İnsanov, həm də digər siyahıda adı olanlar, eləcə də ilk dəfə açıqlanan siyahıda adı qeyd olunmayan siyasətçilər də dəyirmi masaya qatılacaq”.(musavat.com)