Natiq Cəfərlidən Azər Qasımlıya CAVAB
“ReAL heç vaxt bir nəfərin partiyası olmayıb, ola da bilməz. Sədrimiz İlqar bəy həbsdə olanda belə sədr və 1 nömrəli siyasi məhbus olmasına baxmayaraq dəfələrlə zindandan göndərdiyi təklifləri qəbul edilməyib, İlqar bəy də bunu normal qarşılayıb.
İndiki siyasi sistemdə başqa təşkilatlarda bu mümkün deyil”.
Bu sözləri Respublikaçı Alternativ Partiyasının (ReAL) yetkilisi Natiq Cəfərli partiyanın Məclis sədri Azər Qasımlının istefası barədə danışarkən deyib.
“Hər səhər ofisə ən tez İlqar gəlir, çay qoyur, çay dəmləyir, sadə üzvlər istənilən an onun yanına gəlib iradlarını və təkliflərini deyir - belə bir adamı avtoritarizmdə ittiham etmək yersizdir. ReAL təkadam təşkilatı ola bilməz, bu mümkün deyil, belə olsaydı ReAL-ı niyə yaradırdıq ki?! Gedib elə bu gün eyni qaydada idarə olunan partiyalardan birinə yazılardıq da. ReAL həyatda şəxsi uğur hekayəsi yazmış insanların təşkilatıdır. ReAL-ın özəlliyi və gözəlliyi də məhz budur! ReAL həmişə şəxsi incikliyini və ambisiyasını arxa plana alan liderlərin təşkilatıdır - bu belədir, belə də olacaq!”-, deyə Natiq Cəfərli əlavə edib.
Bu xəbər üçün şərh yazın